Sorkar thuchhuah tarlan danin, Sialhawk khuaah hian Jal Jeevan Mission (JJM) hnuaiah hian tui connection hi a thlawnin in 520 hnen ah pek a ni tawh a, NABARD hnuaiah Raifan lui tui hi solar pumping a pump chhoh niin 860 meters pump chhoh a ni, stage 4-ah then a ni. Sialhawk khua hi Har Ghar Jal Village a puan tawh niin kum 2025-2026 financial year atan Jal Seeva Ankalan pawh peih fel tawh niin vawiin hian Jal Arpan Diwas hun hman a ni.

Khuallian Er. Lalruatkima SDO, I&WRD chuanin Jal Arpan Diwas hi mimal tan nilovin Sialhawk khaw tan a ni a, he scheme hian a tum ber chu tui thianghlim leh tui hniang hnar zawk Sialhawk khuain an neih theih nan a ni tih a sawi a. Tui lakna ber Raifan lui chu a kiam chak em em a, tun atanga kan tui hnar kan venhim loh chuan nakin zelah Sialhawk khuain buaina an la tawk thei a, chuvang chuan tui hnar te tun atang hian a humhalhna kawng a hma la turin lo kal khawmte chu a sawm a ni.

Er. Liantluanga Chohte, EE PHED Khawzawl WATSAN Division chuan Sialhawk khaw tui lak chungchanga faina pawimawh zia leh khaw mipui te kutah a innghah nasat tawh zia te sawiin, in hlan chhawn (Hand Over) na neih pahin pledge sawi rualna hun a hmanpui bawk a, tui hlut zia leh ruah tui khawl chungchang te a zirtir bawk a ni. Er. Freddy Vanlalmuanawma SDO, PHED, Khawzawl WATSAN Sub-Division chuan technical report a pe bawk a ni.